Dimma [IS]

@dimmamusic

 

https://www.facebook.com/dimmamusic/

https://www.youtube.com/channel/UC05JI8x8U2_pmcd5NU4_xHw

Tegund tónlistar

Rock/Metal

Meðlimir
Stefán Jakobsson – Söngur
Ingo Geirdal – Gítar
Silli Geirdal – Bassi
Birgir Jónsson – Trommur

Heimabær
Reykjavík

DIMMA var stofnuð árið 2004 af bræðrunum Ingó Geirdal (gítarleikara) og Silla Geirdal (bassaleikara)
og vakti sveitin strax athygli rokkunnenda með kraftmiklu þungarokki og mögnuðum tónleikum.

Í október 2005 gaf Dimma út fyrstu breiðskífu sína, sem var samnefnd sveitinni og fylgdi henni m.a. eftir með tónleikaferð til Bandaríkjanna.  Þremur árum síðar kom svo út breiðskífan Stigmata og lögin Dimmey og Mama sem náðu töluverðum vinsældum á öldum ljósvakans. Skömmu eftir útgáfu plötunnar dró þó úr tónleikahaldi Dimmu er meðlimir sveitarinnar lögðu land undir fót.

Í byrjun ársins 2011 urðu manna- og stefnubreytingar í Dimmu er þeir Birgir Jónsson (trommuleikari) og Stefán Jakobsson (söngvari) komu inn í sveitina með nýjar áherslur.

Þá var ákveðið að gera tilraun með íslenskan texta í laginu Þungur Kross sem kom út á þröngskífunni Dogma haustið 2011.

Lagið vakti strax athygli hlustenda og ljóst þótti að móðurmálið hjálpaði mikið til við að gera tónlist Dimmu einlægari og sérstæðari. DIMMA hafði fundið sinn eigin hljóm.

Eftir það var tekin sameiginleg ákvörðun um að næsta breiðskífa Dimmu yrði öll sungin á íslensku og þemað yrði „myrkraverk“ í hinum ýmsu myndum.

 

Árið 2012 fór að mestu í að semja ný lög og texta, auk þess sem mikil vinna var lögð í útsetningar og upptökur á nýju efni. Mörg lögin voru samin í kynngimögnuðu umhverfi í Bjarnafirði á Ströndum, þegar Dimma lagði undir sig yfirgefið sveitahótel um kolsvartan vetur.

Tónlistin á Myrkraverk (sem kom út í lok 2012) ber þess vel merki enda níðþung og myrk og undir sterkum áhrifum frá galdramenningu strandamanna.

Myrkraverk hlaut nánast einróma lof gagnrýnenda og fór í 3. sæti Tónlistans yfir mest seldu plöturnar á Íslandi árið 2013 og var henni fylgt eftir með tvöfaldri tónleikaskífu, Myrkraverk í Hörpu það sama ár.

Ekki leið þó á löngu áður en meðlimir Dimmu hófust aftur handa við að semja nýtt efni og sóttu þá innblástur í alla þá undirförlu leiki, blekkingar og kúgunartækni sem við mannfólkið notum til að stjórna hvort öðru.Yrkisefnið á Vélráð, sem kom út í júní 2014, er dimmt og drungalegt og tónlistin þung og óvægin en jafnframt melódísk. Enda er stundum ljós við enda ganganna.

Vélráð fór stax í efsta sætið á sölulistum, var valin ein besta íslenska plata ársins að mati gagnrýnenda og Dimma fylgdi plötunni eftir með heljarinnar tónleikaferð um landið.
Tveir af eftirminnilegustu tónleikunum, í Hörpu og Laugardalshöll, voru festir á filmu og gefnir út á tvöföldum mynd -og hljóðdiski, Guði Gleymdir sem fór einnig á toppinn í mars 2015.

Á sama ári vakti samstarf Dimmu með Bubba Morthens verðskuldaða athygli sem og tónleikar sveitarinnar með Sinfóníhljómsveit Norðurlands í Hörpu og Hofi sem einnig hafa komið út á mynd -og hljóðdiskum og selst vel.

Enda er Dimma af mörgum talin ein öflugasta tónleikasveit landsins og var m.a. fyrsta sveitin til að hljóta „Krókinn“ – verðlaun Rásar 2 fyrir framúrkarandi lifandi flutning á árinu 2014, auk þess að vera valin flytjandi ársins á Hlustendaverðlaununum 2016.

Í maí 2017 gaf Dimma svo út sína fimmtu breiðskífu, Eldraunir, sem fengið hefur frábæra dóma og er sveitin um þessar mundir að fylgja plötunni eftir með tónleikum vítt og breitt um landið.

 

Útgáfur:

 

DIMMA – CD (2005)

STIGMATA – CD (2008)

DOGMA – CD (2011)

MYRKRAVERK – CD (2012)

MYRKRAVERK Í HÖRPU – CD & DVD (2013)

VÉLRÁÐ – CD (2014)

GUÐI GLEYMDIR – CD & DVD (2015)

BUBBI & DIMMA – CD & DVD (2015)

DIMMA & SINFONIANORD – CD & DVD (2016)

BUBBI & DIMMA – MINNISMERKI (2016)
ELDRAUNIR – CD (2017)
Myndbönd:

 

DIMMA – Ljósbrá

 

 

DIMMA – Ég Brenn

 

DIMMA – Þungur Kross

 

 

 

DIMMA – Kviksyndi

 

 

 

DIMMA & SINFONIANORD – Dimmalimm